سرینگر(نیوز ڈیسک ) بھارت کے زیر قبضہ جموں و کشمیر سے تعلق رکھنے والے عازمین حج نے کہا ہے کہ حج کمیٹی آف انڈیا ان کے ساتھ جانوروں جیسا سلوک کر رہی ہے۔
ریاستی حج کمیٹی کے ذریعے جانے والے کشمیری حاجیوں کو مقدس شہر مدینہ منورہ میں سخت مشکلات کا سامنا ہے۔کچھ حاجیوں نے صحافیوں کو بتایا کہ حج کمیٹی آف انڈیا نے انہیں مدینہ منورہ میں بدترین رہائش فراہم کی ہے۔ ان کا کہناہے کہ 600سے زائد عازمین کو ایک عمارت میں رکھا گیا ہے جن میں بیت الخلاء کی مناسب سہولت ہی نہیں ہے۔زیادہ تر عمارتوں میں حجاج بیت الخلا ء کے سامنے قطاروں میں کھڑے نظر آتے ہیں۔ اس سے بھی بدتر بات یہ ہے کہ بیت الخلا ء کے دروازے ٹھیک طرح سے بند نہیں ہوتے اورنلکے زیادہ تر خشک رہتے ہیں۔ اس صورتحال کی وجہ سے خواتین زائرین کوسخت پریشانی کا سامنا ہے۔ باورچی خانو ں میں بھی کوئی سہولیات نہیں ہیں اوربہت سے باورچی خانوں میں فریج ہی دستیاب نہیں ہے ۔ایک کمرے میں پانچ سے چھ افراد کو رکھا گیا ہے جس کے نتیجے میں خواتین کے لیے کوئی پرائیویسی نہیں ہے۔ ناکافی ایئر کنڈیشنر مسائل میں اضافہ کر رہے ہیں۔ مشتعل حاجی اپنا غصہ نکالنے کے لیے سوشل میڈیا پر ویڈیو کلپس اپ لوڈ کر رہے ہیں۔ایک حاجی نے صحافیوں کے ساتھ گندے باتھ روم کی ویڈیو شیئر کی۔