راولپنڈی(نیوز ڈیسک )آرمی چیف جنرل عاصم منیر نے بنوں کے دورے کے موقع پر خطاب میں کہا ہے کہ دہشت گردوں کے بزدلانہ ہتھکنڈے فوج، قانون نافذ کرنے والے ادارے اور قوم کو کبھی جھکا نہیں سکتے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے بنوں کا دورہ کیا جہاں انہیں گزشتہ روز ہونے والے خودکش دھماکے اور سکیورٹی سے متعلق اقدامات پر بریفنگ دی گئی۔آئی ایس پی آر نے بتایاکہ بنوں میں گزشتہ روز فوجی قافلے پر خود کش حملے میں 9 فوجی شہید ہوئے تھے۔
آرمی چیف نے افسران اور جوانوں سے ملاقات بھی کی اور اُن کے عزم کو سراہا۔ اس کے علاوہ آرمی چیف بنوں دھماکے میں زخمی افراد کی عیادت کیلئے سی ایم ایچ بھی گئے اور زخمی افراد سے ان کی صحت کے بارے میں دریافت کیا۔اس موقع پر آرمی چیف کا کہنا تھاکہ دہشتگردوں کے بزدلانہ حملے دہشتگردی کے خاتمےکا ہمارا عزم کمزور نہیں کر سکتے، پاکستان میں امن و استحکام ہمارے شہدا کی قربانیوں کا مرہونِ منت ہے اور مسلح افواج مادر وطن سے دہشتگردی کا ناسور ہر قیمت پر ختم کرنے کیلئے پرعزم ہیں۔
انہوں نے کہا کہ قوم دکھ کی اس گھڑی میں شہید جوانوں کے اہل خانہ کے ساتھ کھڑی ہے، پاکستانی فوج دہشت گردی کے خلاف کردار ادا کرتی رہے گی۔
جنرل عاصم منیر نے فوجیوں کے بلند حوصلے اور غیر متزلزل عزم کو سراہا اور کہا کہ دہشتگردوں کے بزدلانہ ہتھکنڈے فوج، قانون نافذ کرنے والے ادارے اور قوم کو کبھی جھکا نہیں سکتے، ہم نے دہشت گردی کے خلاف طویل جنگ لڑی ہے اور آخری دم تک لڑتے رہیں گے۔آرمی چیف کا کہنا تھاکہ دہشتگردوں کی خام خیالی ہےکہ وہ ہمارےآہنی عزم اور ریاست کی رٹ کو چیلنج کرسکتے ہیں، قوم شہدا کو زبردست خراج تحسین پیش کرتی ہے اور ان کی قربانیوں کو ہمیشہ یاد رکھا جائے گا۔