فیصل آباد(نیوز ڈیسک )پاکستان مسلم لیگ ن پنجاب کے صدر اور سابق وزیر داخلہ رانا ثنا اللہ نے کہاکہ عالمی عدالت انصاف جانے کا مطلب پاکستان کو عالمی کٹہرے میں مجرم بنا کر کھڑا کرنا ہے،یہ مکروہ کام صرف ملک دشمن اور ان کے کارندے کرتے ہیں۔
نجی ٹی وی چینل جیو نیوز کے مطابق رانا ثنا اللہ کا کہناتھا کہ دہشتگردوں کو پاکستان واپس لانے، رہا کرانے اور آباد کرانے والے اب نہیں نیا راستہ دکھا رہے ہیں،لیگی رہنما کا کہنا تھا کہ جن کا بندہ ہے وہ بچانے کی کوشش کر رہے ہیں، پہلے ہیرو بنایا، فارن فنڈنگ کی، اقتدار دلایا،اقتدار میں لا کر پاکستان کی معیشت ، خارجہ تعلقات تباہ کئے،مہنگائی سے خانہ جنگی کی راہ ہموار کی گئی۔
رانا ثنا اللہ نے کہاکہ عدالتی نظام کے لاڈلے کو باہر جانے کی کیا ضرورت،ان کا کہناتھا کہ پاکستان کو عالمی عدالت لے جانے سے فلسطین، مقبوضہ کشمیر کے غاصبوں کوخوشی ہوئی، کٹھ پتلی کو پاکستان کی عالمی بدنامی کیلئے استعمال کیا جارہا ہے،عمران نیازی پر یہ پیسہ کون خرچ کر رہا ہے؟