میانوالی (نیوز ڈیسک ) پاکستان ایئر فورس ٹریننگ بیس میانوالی پر دہشت گردوں کا حملہ ناکام ہو گیا۔ نجی ٹی وی دنیا نیوز نے آئی ایس پی آر کے حوالے سے بتایا کہ میانوالی ایئرفورس بیس پر دہشت گردوں نے صبح سویرے حملہ کیا تاہم پاک فوج نے بروقت کارروائی کرتے ہوئے سخت جواب دیتے ہوئے حملہ پسپا کر دیا اور 3 دہشت گرد موقع پر مارے گئے۔ بتایا گیا ہے کہ کارروائی کے دوران پہلے سے گراؤنڈ 3 طیاروں کو نقصان پہنچا اور ایک فیول باؤزر کو بھی معمولی نقصان پہنچا۔ سکیورٹی فورسز کے مؤثر ایکشن کے دوران اہلکاروں اور تنصیبات کی حفاظت کو یقینی بنایا گیا۔ آئی ایس پی آر کی جانب سے مزید کہا گیا کہ کلئیرنس اور کومبنگ آپریشن کے دوران مزید 3 دہشت گردوں کے خلاف کارروائی جاری ہے۔