اسلام آباد (نیوز ڈیسک )فلمی شائقین کا طویل انتظار ختم ہوا اور شمعون عباسی و عائشہ عمر کی آنے والی ایکشن تھرلر فلم ’ڈھائی چال‘ کا پہلا ٹریلر جاری کردیا گیا۔
’ڈھائی چال‘ کو تین سال قبل 2019 میں بنانے کا اعلان کیا گیا تھا اور امکان تھا کہ اسے 2020 کی پہلی سہ ماہی میں ریلیز کردیا جائے گا، تاہم ایسا نہ ہوسکا۔
مسلسل تاخیر کے بعد اب فلم کا پہلا ٹریلر جاری کرتے ہوئے اسے جون 2022 میں ریلیز کرنے کا عندیہ بھی دے دیا گیا۔
ہدایت کار تیمور شیرازی کی فلم کی کہانی فرحین چوہدری نے لکھی ہے جب کہ اسے ڈاکٹر عرفان اشرف نے پروڈیوس کیا ہے۔
ہمایوں اشرف، عائشہ عمر، شمعون عباسی، عدنان شاہ ٹیپو، سلیم معراج، اریج چوہدری اور رشید ناز سمیت دیگر اداکاروں پر مبنی فلم کے ٹریلر سے عندیہ ملتا ہے کہ اس کی کہانی پاکستان میں بھارتی مداخلت اور دہشت گردی کے گرد گھومتی ہے۔
ٹریلر میں عائشہ عمر کو شمعون عباسی کی چال چلتے دکھایا گیا ہے—فائل فوٹو: انسٹاگرام
فلم کے ٹریلر میں اہم کرداروں کو بات کرتے ہوئے دکھایا گیا ہے کہ جب بھی بھارت کو اپنے مذموم مقاصد پورے کرنے ہوتے ہیں تب وہ اپنے ہی شہریوں کو مار کر اس کا الزام پاکستان پر لگا دیتا ہے۔
فلم میں عائشہ عمر کو ایک صحافی کے طور پر دکھایا گیا ہے جو کہ شمعون عباسی کی چال چلتی دکھائی دیتی ہیں۔
شمعون عباسی کے کردار کو مبہم رکھا گیا ہے، اسے ٹریلر سے سمجھنا ناممکن ہے۔
فلم کے ٹریلر کو جاری کرتے ہوئے عندیہ دیا گیا ہے کہ اسے 17 جون تک سینما گھروں میں ریلیز کردیا جائے گا۔
View this post on Instagram
