لاہور (مانیٹرنگ ڈیسک ) پاکستان تحریک انصاف (پی ٹی آئی) کے چیئرمین عمران خان 17 دسمبر کو پنجاب اسمبلی کی تحلیل کا اعلان کریں گے ۔ اس ضمن میں 17 تاریخ کو لاہور کے لبرٹی چوک سمیت پنجاب کے تمام ڈویژنل ہیڈکوارٹرز میں عمران خان بیک وقت احتجاجی جلسے سے بھی خطاب کریں گے۔ دوسری جانب اراکین اسمبلی نے صوبائی اسمبلی کی تحلیل کے فیصلے کی توثیق بھی کردی ہے۔
ذرائع کے مطابق عمران خان نے صوبائی اسمبلی تحلیل کرنے کے لیے 17 دسمبر کو لاہور میں احتجاجی جلسے کااعلان کردیا ہے ۔ لاہور میں احتجاجی جلسہ لبرٹی مارکیٹ جبکہ پنجاب کے تمام ڈویژنل ہیڈکوارٹرز میں جلسہ ہوگا جس سے عمران خان ویڈیو لنک کے ذریعے خطاب کریں گے۔عمران خان نے وسطی پنجاب سمیت لاہور تنظیم کو جلسے کی تیاریوں کی ہدایات جاری کردی ہیں۔
اس حوالے سے بات کرتے ہوےحماد اظہر نے بتایا کہ اجلاس میں سرگودھا اور ساہیوال ڈویژن کے ارکان اسمبلی سے ملاقات کے دوران عمران خان کا کہنا تھا کہ پاکستان بدترین معاشی صورتحال میں پھنس چکا ہے جس سے نکلنے کا واحد راستہ جلد انتخابات ہیں، ہم سیاست نہیں ریاست بچارہے ہیں ارکان اسمبلی نے پنجاب اسمبلی تحلیل کرنے کے عمران خان کے فیصلے کی مکمل تائید کی ہے۔