بھارتی کرکٹ لیگ نے دو آسٹریلوی کرکٹرز کو خطیر رقم کی پیشکش کر دی تاہم انہوں نے پیشکش یہ کہہ کر ٹھکرا دی کہ ہماری اپنے ملک سے کمٹمنٹ ہے۔

آسٹریلوی میڈیا کے مطابق آئی پی ایل کے ایک ٹیم گروپ نے تقریباً 10 ملین ڈالر سالانہ کے عوض پیٹ کمنز اور ٹریوس ہیڈ کو کل وقتی اوورسیز ٹی ٹوئنٹی لیگز کھیلنے کیلیے پیشکش کی تاہم پیٹ کمنز اور ٹریوس ہیڈ نے پیشکش مسترد کرکے ملک سے وابستگی کو ترجیح دی۔

پیٹ کمنز اور ٹریوس ہیڈ نے کرکٹرز نے بھارت کے ٹیم گروپ کو بتایا کہ ان کی اپنے ملک سے مکمل کمٹمنٹ ہے اور اپنے ملک کیلئے کھیلنا ہمارے لئے اعزاز ہے۔

میڈیا رپورٹس میں بتایا گیا ہے کہ  ٹاپ آسٹریلوی کرکٹرز نیشنل کنٹریکٹس سے سال میں 1.5 ملین ڈالر کماتے ہیں جبکہ پیٹ کمنز کپتانی کا الاؤنس ملا کر تقریباً 3 ملین ڈالر سالانہ  کماتے ہیں۔

آسٹریلوی میڈیا کے مطابق ڈالروں کی پیشکش کا انکشاف بگ بیش لیگ کو پرائیویٹائز کرنے کے حوالے سے ہونے والے اجلاس میں ہوا۔

پیٹ کمنز اور ٹریوس ہیڈ کے اس فیصلے کو آسٹریلیا میں شائقین اور ماہرین نے سراہا ہے اور اسے قومی کھیل کے وقار کی جیت قرار دیا ہے۔

اس سے قبل 2023 میں انگلینڈ کے جوفرا آرچر کو بھارتی لیگ کی ایک ٹیم نے ایک سال کے لیے 7.5 ملین ڈالر کی پیشکش کی تھی جسے انہوں نے مسترد کر دیا تھا۔