مصباح الحق کو ایک بار پھرپاکستان کرکٹ بورڈ میں اہم ذمہ داری ملنے کا امکان ہے۔

نجی ٹی وی نے ذرائع کا حوالہ دیتے ہوئے کہا ہے کہ مصباح الحق Misbah ul Haq کی ڈائریکٹر کرکٹ آپریشنز انٹرنیشنل تقرری کا امکان ہے۔

چند دن قبل پاکستان کرکٹ بورڈ نے ڈائریکٹر کرکٹ آپریشنز انٹرنیشنل کے لیے اشتہار دیا تھا۔ ذرائع کا کہنا ہے کہ اشتہار میں اہلیت کے لیے پہلی مرتبہ سابق ٹیسٹ کرکٹر یا ون ڈے انٹرنیشنل کرکٹر کی شرط رکھی گئی ہے۔

واضح رہے کہ پاکستان کرکٹ بورڈ نے پاک بھارت تنازع میں ڈائریکٹر کرکٹ آپریشنز انٹرنیشنل عثمان واہلہ کو اپنی ذمہ داری ادا کرنے سے روک دیا تھا۔

2019 ء میں مصباح الحق کو اس وقت کے پی سی بی چیئرمین احسان مانی نے چیف سلیکٹر اور ہیڈ کوچ کی ذمہ داریاں سونپی تھیں، انہیں تین سالہ کنٹریکٹ دیا گیا، 2020 میں انہوں نے چیف سلیکٹر کے عہدے سے استعفی دے دیا تھا۔ 6 ستمبر 2021 میں انہوں نے ہیڈ کوچ کے عہدے سے بھی استعفیٰ دے دیا تھا۔

24 جولائی 2023 میں مصباح الحق کی پاکستان کرکٹ بورڈ میں دوبارہ انٹری ہوئی، انہیں پی سی بی مینجمنٹ کمیٹی کے سربراہ ذکا اشرف کے کرکٹ امور کا مشیر مقرر کیا گیا اور طے ہوا کہ یہ ذمہ داریاں وہ بلامعاوضہ انجام دیں گے۔