اسلام آباد کے شہریوں پر مشتمل تنظیم سٹیزن فورم نے مطالبہ کیا ہے کہ کیپیٹل ڈیولپمنٹ اتھارٹی ( سی ڈی اے ) فوری طور پر کیپیٹل ڈیولپمنٹ اتھارٹی آرڈیننس 1960 اور اسلام آباد رہائشی زوننگ ریگولیشنز کی کھلی خلاف ورزیوں کا نوٹس لے۔ اسلام آباد کے رہائشی علاقے، جو پرسکون زندگی کے لیے بنائے گئے تھے، غیر قانونی تجارتی مراکز بن گئے ہیں، جن میں ہاسٹلز، کلینکس، اور یہاں تک کہ بین الاقوامی میڈیا ہاؤسز شامل ہیں۔
رہائشی علاقے رہائش کے لیے ہیں، کاروبار کے لیے نہیں!
یہ سرگرمیاں نہ صرف علاقے کے سکون کو ختم کر رہی ہیں بلکہ ٹریفک، پارکنگ کے مسائل اور ماحولیاتی نقصان کا سبب بھی بن رہی ہیں۔ یہ سب موجودہ قواعد و ضوابط کی کھلی خلاف ورزی ہے۔ لندن اور دبئی جیسے شہروں میں رہائشی علاقوں کی حفاظت کے لیے سخت قوانین نافذ کیے جاتے ہیں۔ اسلام آباد کے شہری بھی اسی احترام کے حقدار ہیں۔
کیپیٹل ڈیولپمنٹ اتھارٹی کو چاہئے کہ:-
1۔ اپنے تمام سیکٹرز کا جامع سروے کرے۔
2۔ تمام غیر قانونی تجارتی سرگرمیوں کو، چاہے وہ کتنی ہی بااثر کیوں نہ ہوں، بند کرے۔
3۔ قوانین پر سختی سے عملدرآمد کرے تاکہ رہائشی علاقوں کی سکونت اور حفاظت کو یقینی بنایا جا سکے۔
فورم نے کہا ہے کہ ہم خاموش نہیں رہیں گے! اپنے حق کے لیے آواز بلند کریں اور کیپیٹل ڈیولپمنٹ اتھارٹی سے جوابدہی کا مطالبہ کریں گے تاکہ ہمارے علاقے دوبارہ پُرامن اور محفوظ بن سکیں۔