پیرس (نیوز ڈیسک ) عالمی انسداد منی لانڈرنگ واچ ڈاگ فنانشل ایکشن ٹاسک فورس (فیٹف) نے کہا ہے کہ اس نے یوکرین پر ماسکو کے حملے پر روس کی رکنیت معطل کر دی ہے۔
فیٹف کی جانب سے کہا گیا ہے کہ روسی فیڈریشن کے اقدامات ناقابل قبول طور پر فیٹف کے بنیادی اصولوں کے خلاف ہیں جن کا مقصد سلامتی، تحفظ اور عالمی مالیاتی نظام کی سالمیت کو فروغ دینا ہے۔ روس اب بھی ایف اے ٹی ایف کے معیارات پر عمل درآمد کے لیے جوابدہ ہے۔
خبر ایجنسی اے ایف پی کے مطابق پیرس میں ہونے والے پانچ روزہ اجلاس کے بعد فیٹف نے نائجیریا اور جنوبی افریقہ کو ان ممالک کی فہرست میں شامل کیا جن کی نگرانی میں اضافہ کیا گیا، اور کمبوڈیا اور مراکش کو اس کیٹیگری سے نکال دیا۔
خیال رہے کہ یوکرین پر حملے کے بعد روس کو پہلے ہی یورپ کی کونسل سے نکال دیا گیا ہے اور اقوام متحدہ کی انسانی حقوق کونسل سے معطل کر دیا گیا ہے لیکن وہ اب بھی کئی بین الاقوامی تنظیموں کا رکن ہے۔