فیڈرل بورڈ آف ریونیو (ایف بی آر) کے ماتحت ادارے پاکستان کسٹمز کلیکٹریٹ آف کسٹمز (انفورسمنٹ) حیدرآباد نے اسمگلنگ کے خلاف بڑی کارروائی کرتے ہوئے 7 کروڑ 70 لاکھ روپے سے زائد مالیت کی نان کسٹم پیڈ گاڑیاں، اسمگل شدہ اشیا اور پیٹرولیم مصنوعات برآمد کر لیں۔ کارروائیاں گزشتہ ایک ہفتے کے دوران انٹیلی جنس اطلاعات کی بنیاد پر کی گئیں، جن میں 21 نان کسٹم پیڈ گاڑیوں سمیت مختلف اسمگل شدہ سامان اور 15 ہزار لیٹر ہائی اسپیڈ ڈیزل بھی ضبط کیا گیا۔
ایف بی آر کے مطابق انسدادِ اسمگلنگ مہم کے تحت کی گئی ان کارروائیوں میں برآمد ہونے والی اشیا کی مجموعی مالیت 77 ملین روپے سے زائد ہے۔ ضبط شدہ سامان میں الیکٹرانکس، بھارتی ساختہ ممنوعہ گٹکا، صنعتی مصنوعات، ٹیکسٹائل کا سامان اور پیٹرولیم مصنوعات شامل ہیں۔
ترجمان ایف بی آر کا کہنا ہے کہ یہ کامیاب کارروائیاں اسمگلنگ کے خاتمے، قانونی تجارت کے فروغ اور قومی محصولات کے تحفظ کے لیے پاکستان کسٹمز کے عزم کی عکاس ہیں، جبکہ اسمگلنگ میں ملوث عناصر کے خلاف قانونی کارروائی بھی شروع کر دی گئی ہے۔
مزید پڑھیں:رشوت کا مطالبہ؛ وزارتِ منصوبہ بندی کے افسران کیخلاف اسلام آباد ہائیکورٹ میں درخواست
