ہزاروں لیگو بلاکس سے تیار اسپورٹس کار نے رفتار کا نیا ریکارڈ قائم کر دیا
لیگو نے اپنی نئی ٹیکنِک کوینیگ سیگ جیسکو ایبسلوٹ سیٹ کی تشہیر کے لیے ایک منفرد اور حیران کن منصوبے کے تحت اس سپرکار کا حقیقی سائز کا ماڈل تیار کیا ہے، جو تقریباً 3 لاکھ 28 ہزار لیگو ٹیکنک پرزوں کی مدد سے بنایا گیا۔
اس منفرد شاہکار کو معروف ٹیسٹ ڈرائیور مارکس لندھ نے برطانیہ کے مشہور گڈ ووڈ ہل کلائمب ٹریک پر چلایا، جہاں اس نے شائقین کی بھرپور توجہ حاصل کرنے کے ساتھ دنیا کی تیز ترین لیگو کار کا نیا ریکارڈ بھی اپنے نام کر لیا۔ گاڑی کی رفتار سابق ریکارڈ 50 کلومیٹر فی گھنٹہ سے کہیں زیادہ رہی۔
مکمل سائز پر تیار کی گئی یہ گاڑی انجینئرنگ اور ڈیزائن کا ایک غیر معمولی نمونہ قرار دی جا رہی ہے۔ لیگو ٹیم نے اس منصوبے کی تکمیل کے لیے تقریباً 9 ہزار 400 گھنٹے صرف کیے، جبکہ تیار ہونے کے بعد یہ ماڈل ظاہری طور پر حقیقی کوینیگ سیگ سپرکار سے انتہائی مشابہ دکھائی دیتا ہے۔
لیگو کے ڈیزائن لیڈ لوبور زیلنکا کے مطابق یہ اب تک کا سب سے پیچیدہ اور کم وقت میں مکمل کیا جانے والا منصوبہ تھا۔ ان کا کہنا تھا کہ ٹیم کا ہدف گاڑی کو 100 کلومیٹر فی گھنٹہ کی رفتار تک پہنچانا تھا۔
انہوں نے بتایا کہ ماڈل میں کوینیگ سیگ کے مشہور ’’گھوسٹ موڈ‘‘ کو بھی شامل کیا گیا ہے، جس کے تحت گاڑی کے مختلف باڈی پینلز کھولے جا سکتے ہیں، جس سے یہ حقیقی سپرکار کا احساس مزید بڑھا دیتی ہے۔
اس گاڑی کا مجموعی وزن تقریباً 1800 کلوگرام ہے، جس میں سے 400 کلوگرام کے قریب حصہ لیگو پرزوں پر مشتمل ہے۔ اس میں کسٹم میٹل چیسس، ایف آئی اے معیار کا رول کیج، کوینیگ سیگ کے کاربن فائبر ویلز اور مکمل سسپنشن سسٹم بھی نصب کیا گیا ہے۔
اگرچہ اصل سپرکار کے مقابلے میں یہ ماڈل ایک نسبتاً چھوٹی برقی موٹر سے چلتا ہے، تاہم اس کے باوجود یہ 111 کلومیٹر فی گھنٹہ کی رفتار حاصل کرنے میں کامیاب رہا، جو لیگو سے تیار کردہ گاڑیوں کے لیے ایک نئی کامیابی سمجھی جا رہی ہے۔
مزید پڑھیں: امریکی شہری نے جلتی مشعلوں کے ساتھ کرتب دِکھا کر نیا ریکارڈ بنا ڈالا
