کابل: پاکستان میں امارت اسلامیہ افغانستان کے سفیر سردار احمد شکیب نے کہا ہے کہ افغان حکومت پاکستان کے ساتھ تمام معاملات مذاکرات اور باہمی رابطوں کے ذریعے حل کرنے کی خواہاں ہے۔
افغان میڈیا کے مطابق طلوع نیوز کو دیے گئے انٹرویو میں سردار احمد شکیب نے کہا کہ کابل کی پالیسی ہے کہ اسلام آباد کے ساتھ اختلافات اور دیگر معاملات کو بات چیت کے ذریعے نمٹایا جائے۔
انہوں نے کہا کہ پاکستان اور افغانستان کے درمیان جاری تناؤ نے دونوں ممالک کو نقصان پہنچایا ہے، جبکہ اس کے منفی اثرات سرحد کے دونوں جانب رہنے والے عوام پر بھی مرتب ہوئے ہیں۔
افغان سفیر کا کہنا تھا کہ موجودہ صورتحال دونوں فریقوں کے مفاد میں نہیں، کیونکہ اس سے دوطرفہ تعلقات متاثر ہوتے ہیں اور عوام کو مشکلات کا سامنا کرنا پڑتا ہے۔ انہوں نے اس امید کا اظہار کیا کہ مسائل کا پائیدار حل صرف مذاکرات کے ذریعے ہی ممکن ہے، اور یہی امارت اسلامیہ افغانستان کی پالیسی بھی ہے۔
دوسری جانب سیاسی تجزیہ کاروں کا کہنا ہے کہ پاکستان اور افغانستان کے درمیان سفارتی رابطوں اور مذاکرات کا تسلسل برقرار رہنے سے کشیدگی میں کمی آسکتی ہے، جبکہ دونوں ممالک کے درمیان سیاسی، اقتصادی اور تجارتی تعاون کو فروغ دینے کے امکانات بھی روشن ہو سکتے ہیں۔
مزید پڑھیں: افغانستان اپنے باپ کےنقش قدم پر۔
