سری نگر(نیوز ڈیسک ) مقبوضہ کشمیر کے سابق وزیر اعلی اور نیشنل کانفرنس کے صدر ڈاکٹر فاروق عبداللہ نے کہا ہے کہ جموں و کشمیر اس وقت سخت ترین دور سے گزر رہا ہے اور وقت کی ضرورت ہے کہ ہم سب تمام سیاسی اور نظریاتی اختلافات بالائے طاق رکھ کر اپنی ریاست کے خصوصی درجے کی بحالی کیلئے متحد ہوجائیں۔
عمرہ کی سعادت حاصل کرنے کے بعد سری نگر واپسی پر پارٹی کارکنوں سے خطاب کرتے ہوئے انہوں نے کہاکہ اس نازک اور مشکل ترین دور سے نجات کا راز اتحاد و اتفاق ہی ہے اور جموں وکشمیر کے ہر ایک پشتینی باشندے کو ثابت قدم، پرعزم اور یک زبان ہونے کا مظاہرہ کرنا ہوگا۔انہوں نے کہاکہ موجودہ دور میں جموں وکشمیر کی شناخت، سالمیت، وحدت، انفرادیت خصوصا بھائی چارے کو قائم و دائم رکھنا ہمارے لئے موت و حیات کا سوال ہے۔ ہمیں اپنے تہذیب و تمدن، کلچر کے علاوہ ان چیزوں کی رکھوالی کرنے ہے ، جو کشمیریوں کو خاص بناتی ہیں۔
ڈاکٹر فاروق عبداللہ نے کہاکہ موجودہ درآمدہ شدہ حکمران اقتدار میں نشے میں اتنے محو ہے کہ ان کے کانوں تک لوگوں کی حق کی آواز نہیں پہنچ رہی ہے۔ ایسے میں ہم پر یہ ذمہ داری عائد ہوتی ہے کہ ہم لوگوں کیساتھ زیادہ سے زیادہ رابطہ بنائے رکھیں اور ان کی آواز بن کر انہیں راحت پہنچانے کی کوشش کریں۔ڈاکٹر فاروق عبداللہ نے پارٹی لیڈران، عہدیداران اور کارکنان سے اپیل کی کہ وہ اپنے آپ میں خود اعتمادی اور خدا اعتمادی کا جذبہ پیدا کرکے قوم و ملت کی خدمت میں جٹ جائیں اور اپنی جماعت نیشنل کانفرنس کو مضبوط بنانے کیلئے دن رات کام کریں۔
