سرینگر (نیوز ڈیسک)نریندر مودی کی فسطائی بھارتی حکومت نے بھارت کے غیر قانونی زیر قبضہ جموں و کشمیر میں گروپ 20 اجلاس کے دوران حفاظتی اقدامات کے نام پر مزید فورسز اہلکار علاقے میں تعینات کر دیے ہیں۔
ایک پولیس افسر نے سری نگر میں ذرائع ابلاغ کو بتایا کہ میرین اور این ایس جی نیشنل سیکیورٹی گارڈ کے کمانڈوز مہمانوں اور تقریب کے مقام کی حفاظت کے لیے تعینات کیے جائیں گے۔
انہوں نے کہا کہ کمانڈو ٹیموں کو ڈرون حملوں کا مقابلہ کرنے کے لیے سپیشل آپریشن گروپ (ایس او جی ) کے اہلکاروں کے ساتھ تعینات کیا جائے گا۔
یاد رہے کہ مودی حکومت عالمی سطح پر تسلیم شدہ متنازعہ خطے مقبوضہ جموںوکشمیر گروپ 20فورم کا اجلاس منعقد کرنے جا رہی ہے ۔ یہ اجلاس 22 سے 24 مئی کے درمیان سری نگرمیں ہوگا۔ مودی حکومت کا یہ اقدام جموںوکشمیر کے بارے میں اقوام متحدہ کی قرار دادوں اور عالمی قانون کی صریح خلاف ورزی ہے۔ فسطائی بی جے پی حکومت اس اجلاس کے ذریعے عالمی برادری کو یہ تاثر دینا چاہتی ہے کہ مقبوضہ جموںوکشمیر میں حالات بالکل ٹھیک ہیں۔
