انسداد دہشت گردی عدالت راولپنڈی علیمہ خان کو گرفتار کرکے پیش کرنے کا حکم دے دیا۔
انسداد دہشت گردی عدالت راولپنڈی میں علیمہ خان سمیت 11 ملزمان کے خلاف 26 نومبر کے احتجاج پر درج مقدمے کی سماعت ہوئی۔
علیمہ خان اور ان کے وکلاء آج بھی عدالت پیش نہیں ہوئے، پیش نہ ہونے پر عدالت نے دسویں مرتبہ علیمہ خان کے ناقابل ضمانت وارنٹ گرفتاری جاری کردیے۔
مقدمے میں نامزد دیگر ملزمان عدالت پیش ہوئے جبکہ عدالت نے علیمہ خان کو گرفتار کرکے 17 نومبر کو پیش کرنے کا حکم بھی دیا، مقدمے کی سماعت 17 نومبر تک ملتوی کر دی گئی۔
مقدمے کی سماعت انسداد دہشت گردی عدالت کے جج امجد علی شاہ نے کی،علیمہ خان سمیت 11 ملزمان کے خلاف تھانہ صادق آباد میں مقدمہ درج ہے۔
علیمہ خان اور دیگر ملزمان پر جلاؤ گھیراؤ، کارسرکار میں مداخلت اور کارکنان کو پرتشدد احتجاج پر اکسانے کا الزام ہے۔
