اقوام متحدہ سلامتی کونسل کے غزہ سے متعلق اہم اجلاس میں نائب وزیراعظم و وزیر خارجہ اسحاق ڈار نے خطاب کرتے ہوئے اسرائیل کی جانب سے سیز فائر کی مسلسل خلاف ورزیوں کی شدید مذمت کی ہے۔
اپنے خطاب میں اسحاق ڈار کا کہنا تھا کہ سیز فائر معاہدے کا مکمل احترام کیا جانا چاہیے اور سیز فائر کے بعد ہونے والے اسرائیلی حملوں میں درجنوں فلسطینی شہید ہوچکے ہیں۔
انہوں نے کہا کہ اسرائیل مسلسل عالمی قوانین کی خلاف ورزی کر رہا ہے جس کا عالمی برادری کو فوری نوٹس لینا چاہیے۔
وزیر خارجہ نے فلسطینیوں کے حقِ خودارادیت کے احترام پر زور دیتے ہوئے کہا کہ مقبوضہ علاقوں میں اسرائیلی توسیع پسندانہ منصوبے فوری طور پر بند کرائے جائیں، انہوں نے غزہ میں تعمیر نو کا عمل بغیر کسی تاخیر کے شروع کرنے کا مطالبہ بھی کیا۔
اسحاق ڈار نے کہا کہ آٹھ اسلامی ممالک نے اسرائیلی اقدامات کی مذمت کی ہے اور غزہ میں قیامِ امن کے لیے پاکستان آٹھ ملکی اسلامی اتحاد میں شامل ہوچکا ہے، انہوں نے واضح کیا کہ فلسطینی اتھارٹی کا مرکزی کردار ہر مرحلے پر لازم و ملزوم ہے۔
نائب وزیراعظم نے غزہ سے فلسطینیوں کو بیدخل کرنے کے کسی بھی اسرائیلی اقدام کی سخت الفاظ میں مذمت کرتے ہوئے کہا کہ پاکستان امن پلان میں بھرپور کردار ادا کرنے کے لیے تیار ہے۔
