پاکستان نے بدلتی ہوئی علاقائی اور عالمی صورت حال پر ٹھوس اہداف کے ساتھ فعال اور نتیجہ خیز سفارتی کردار ادا کرنے کا عزم دہراتے ہوئے تنازعات کے حل کے لیے مذاکرات کی اہمیت پر زور دیا ہے۔
ترجمان دفترخارجہ کے مطابق نائب وزیراعظم اور وزیر خارجہ اسحاق ڈار کی زیر صدارت وزارت خارجہ میں ایک اہم اجلاس منعقد ہوا، جس میں سیکرٹری خارجہ آمنہ بلوچ اور دیگر سینئر حکام نے شرکت کی اور اجلاس میں خطے کی صورت حال پر تبادلہ خیال کیا گیا۔
اعلامیے میں کہا گیا کہ اجلاس میں خطے میں تیزی سے بدلتی ہوئی صورت حال اور آئندہ بین الاقوامی مصروفیات کا تفصیلی جائزہ لیا گیا۔
انہوں نے کہا کہ واضح حکمت عملی، اسٹریٹجک وژن اور ٹھوس اہداف کے ساتھ نتائج پر مرکوز سفارت کاری وقت کی اہم ضرورت ہے۔
اجلاس میں اس عزم کا اظہار کیا گیا کہ پاکستان بدلتی ہوئی علاقائی و عالمی صورت حال کے تناظر میں فعال اور نتیجہ خیز سفارتی کردار ادا کرتا رہے گا۔
