وزیرِ خارجہ اسحاق ڈار نے سنگاپور کے قریب جہازوں پر پاکستانی اور ایرانی عملے کی بحفاظت واپسی کیلیے سنگاپور کے وزیرِ خارجہ ویوین بالاکرشنن سے ٹیلیفونک رابطہ کیا۔
وزیر خارجہ نے امریکی حکام کی تحویل سے 11 پاکستانی، 20 ایرانی بحری کارکنوں کی وطن واپسی میں تعاون کی درخواست کی۔ امریکا کی جانب سے تحویل میں لیے گئے جہاز اس وقت سنگاپور کے قریب سمندری حدود میں موجود ہیں۔
اسحاق ڈار نے ’ایکس‘ پر اپنے بیان میں کہا ہے کہ ایرانی وزیرِ خارجہ عباس عراقچی سے بھی اس معاملے پر بات چیت کی ہے اور دونوں ممالک اس صورتِ حال پر قریبی رابطے میں ہیں۔
انہوں نے مزید کہا کہ پاکستان ایرانی شہریوں کی پاکستان کے راستے ایران واپسی میں بھی ہر ممکن سہولت فراہم کرنے کے لیے تیار ہے۔
انہوں نے سنگاپور کے تعاون اور حمایت کو سراہتے ہوئے کہا کہ پاکستانی فترِ خارجہ اور متعلقہ ادارے امریکی حکام سمیت دیگر فریقین کے ساتھ مسلسل رابطے میں ہیں تاکہ پاکستانی شہریوں کی جلد وطن واپسی کو یقینی بنایا جا سکے۔
