گورنرخیبرپختونخوا فیصل کریم کنڈی نے کہا ہے کہ آبنائے ہرمز میں کشیدگی کے باعث تیل کی سپلائی مشکلات کا شکار ہے، ایسے حالات میں حکومت کو چاہیے کہ دیگراخراجات کم کرکے عوام کو پیٹرولیم مصنوعات کی قیمتوں میں ریلیف فراہم کرے۔
انہوں نے کہا کہ آج سی این جی بند ہے جبکہ ملک میں پیدا ہونے والی گیس بھی مقامی عوام کو فراہم نہیں کی جا رہی، جو تشویشناک صورتحال ہے۔
فیصل کریم کنڈی نے کہا کہ پنجاب سے گندم کی نقل و حمل پر پابندی بھی عوام اور کاروباری حلقوں کیلئے مسائل پیدا کر رہی ہے۔
انہوں نے ضم شدہ اضلاع میں ٹیکسوں کے نفاذ کے معاملے پر صوبائی حکومت کو تنقید کا نشانہ بناتے ہوئے کہا کہ اگر صوبائی حکومت مقدمہ نہیں لڑسکتی تو پیپلزپارٹی کو موقع دیا جائے تاکہ عوام کے حقوق کا دفاع کیا جا سکے۔
گورنرخیبرپختونخوا نے 9 مئی کے مقدمات کا فوری ٹرائل کرنے کا مطالبہ کرتے ہوئے کہا کہ ذمہ دارعناصر کو جلد سزا ملنی چاہیے، صوبائی چیف ایگزیکٹو اگر “معرکہ حق” کی تقریب میں شریک ہوتے تو ایک مثبت پیغام جاتا۔
انہوں نے مزید کہا کہ پاکستان نے 47 سال پرانے دشمن ممالک ایران اورامریکا کوایک میز پر بٹھا کر اہم سفارتی کامیابی حاصل کی۔
ان کا کہنا تھا کہ خیبرپختونخوا وسائل سے مالا مال صوبہ ہے مگراب تک ان وسائل کوعالمی سطح پرمؤثرانداز میں پیش نہیں کیا جا سکا۔ وزیراعلیٰ کو پولیس اور سیکیورٹی اداروں کے ساتھ مل کر امن وامان کیلئے ٹھوس اقدامات کرنے چاہئیں۔
