قومی ٹیم کے ہیڈ کوچ مائیک ہیسن نے کہا ہے کہ بہترین ون ڈے اسکواڈ بنانے پر کام کر رہے ہیں۔
پاکستان کرکٹ بورڈ کے پوڈکاسٹ کی 75ویں قسط میں وائٹ بال ٹیم کے ہیڈ کوچ مائیک ہیسن نے کہا کہ ورلڈ کپ کو مدنظر رکھتے ہوئے ون ڈے انٹرنیشنل اسکواڈ پر بھرپور کام جاری ہے۔
مائیک ہیسن کا کہنا تھا کہ ٹیم مینجمنٹ کا ہدف آئندہ ڈیڑھ سال کے دوران بہترین ممکنہ ون ڈے اسکواڈ تیار کرنا ہے۔ انہوں نے کہا کہ حالیہ وائٹ بال کیمپ نے نئے ٹیلنٹ کو جانچنے کا بہترین موقع فراہم کیا اور نوجوان کھلاڑیوں میں بے پناہ صلاحیت موجود ہے تاہم انہیں مزید محنت اور وقت درکار ہے۔
ہیڈ کوچ کے مطابق پاکستان کو ون ڈے کرکٹ میں خاص طور پر مڈل اوورز کے دوران مؤثر بیٹنگ کی ضرورت ہے جبکہ پاور پلے میں زیادہ وکٹیں حاصل کرنے اور بالنگ میں تسلسل لانے پر بھی توجہ مرکوز کی جا رہی ہے۔
انہوں نے مزید کہا کہ فٹنس کے معیار میں بہتری سے کھلاڑیوں کی مجموعی کارکردگی مزید بہتر ہوگی۔ مائیک ہیسن نے کہا کہ آسٹریلیا کرکٹ ٹیم کے خلاف آئندہ سیریز نوجوان کھلاڑیوں کے لیے اپنی صلاحیتیں دکھانے کا بہترین موقع ثابت ہوگی۔
