اسلام آباد: وزیراعظم شہباز شریف نے انتخابات میں پیپلز پارٹی کی کامیابی پر اپنے خصوصی پیغام میں صدر آصف زرداری اور بلاول بھٹو کو مبارکباد دی ہے۔
وزیراعظم نے گلگت بلتستان میں شفاف، آزاد اور پرامن انتخابات کے انعقاد پر عوام کو مبارکباد پیش کرتے ہوئے انتخابی عمل میں بھرپور شرکت کو جمہوریت کی مضبوطی کے لیے خوش آئند قرار دیا ہے۔
وزیراعظم نے کہا کہ گلگت بلتستان کے عوام سیاسی سرگرمیوں میں بھرپور شرکت پر خصوصی تحسین کے مستحق ہیں، انہوں نے کہا کہ پرامن اور شفاف انتخابات جمہوریت کا حسن ہیں اور اس عمل نے جمہوری روایات کو مزید مضبوط کیا ہے۔
وزیراعظم شہباز شریف نے کہا کہ پاکستان پیپلز پارٹی اکثریتی جماعت بن کر ابھری ہے، جس پر وہ صدر آصف علی زرداری اور چیئرمین بلاول بھٹو زرداری کو مبارکباد پیش کرتے ہیں۔
انہوں نے مسلم لیگ (ن) کے کامیاب امیدواروں کو بھی مبارکباد دیتے ہوئے کہا کہ پارٹی کی پوری ٹیم نے انتخابی مہم کے دوران بھرپور محنت کی۔ وزیراعظم نے گلگت بلتستان کے تمام کامیاب امیدواروں کے لیے بھی نیک خواہشات کا اظہار کیا۔
شہباز شریف نے کہا کہ الیکشن کمیشن نے غیر جانبدار اور شفاف انتخابات کے انعقاد کو یقینی بنایا جبکہ قانون نافذ کرنے والے اداروں نے پرامن انتخابی ماحول برقرار رکھنے میں قابلِ ستائش کردار ادا کیا۔
وزیراعظم نے امید ظاہر کی کہ نومنتخب نمائندے گلگت بلتستان کی ترقی، خوشحالی اور عوامی فلاح و بہبود کے لیے مؤثر کردار ادا کریں گے۔
