فیفا ورلڈ کپ 2026 میں شرکت کے لیے امریکا پہنچنے والی سینیگال کی قومی فٹبال ٹیم کی مبینہ سخت سیکیورٹی جانچ پڑتال کی ویڈیو سوشل میڈیا پر توجہ کا مرکز بن گئی ہے۔
یہ ویڈیو معروف افریقی فٹبال صحافی نے سوشل میڈیا پلیٹ فارم ایکس پر شیئر کی جس کے بعد اس پر مختلف حلقوں میں بحث شروع ہو گئی۔
ویڈیو میں سینیگال کے کھلاڑیوں کو ٹیم کی جرسیوں میں ہوائی اڈے کے رن وے پر اپنے سامان کے قریب کھڑا دیکھا جا سکتا ہے جہاں سیکیورٹی اہلکار ان کی جانچ پڑتال کرتے دکھائی دیتے ہیں۔
ویڈیو کے ایک حصے میں ایک کھلاڑی اپنے بازو پھیلائے کھڑا ہے جبکہ ایک اہلکار سیکیورٹی ڈیوائس کے ذریعے اس کی تلاشی لیتا نظر آتا ہے۔
اطلاعات کے مطابق یہ کارروائی کھلاڑیوں کے ٹرمینل میں داخل ہونے سے قبل کی گئی۔
تاہم اس ویڈیو کے حوالے سے سینیگال فٹبال فیڈریشن، فیفا یا امریکی حکام کی جانب سے تاحال کوئی باضابطہ بیان جاری نہیں کیا گیا ہے۔
واضح رہے کہ فیفا ورلڈ کپ 2026 کی میزبانی امریکا، کینیڈا اور میکسیکو مشترکہ طور پر کر رہے ہیں جبکہ سینیگال اس عالمی ٹورنامنٹ میں حصہ لینے والی ٹیموں میں شامل ہے۔
