کراچی: محکمہ موسمیات نے آئندہ تین روز کے دوران کراچی میں مطلع جزوی ابر آلود، موسم گرم اور مرطوب رہنے کی پیش گوئی کرتے ہوئے کہا ہے کہ اس دوران شہر میں وقفے وقفے سے تیز ہوائیں بھی چل سکتی ہیں۔
محکمہ موسمیات کے مطابق کراچی میں صبح اور رات کے اوقات میں بعض مقامات پر ہلکی بوندا باندی کا امکان ہے، جبکہ آئندہ چند روز تک سمندری ہوائیں مکمل طور پر فعال رہنے کی توقع ہے۔
شہر میں اگلے تین روز کے دوران زیادہ سے زیادہ درجہ حرارت 34 سے 36 ڈگری سینٹی گریڈ کے درمیان رہنے کا امکان ہے۔ صبح کے وقت ہوا میں نمی کا تناسب 75 فیصد جبکہ شام کے اوقات میں 65 فیصد تک رہنے کی پیش گوئی کی گئی ہے۔
دوسری جانب صوبے کے بیشتر علاقوں میں موسم گرم اور خشک رہنے کا امکان ظاہر کیا گیا ہے، تاہم آج دادو سمیت چند علاقوں میں گرد آلود ہوائیں، آندھی اور گرج چمک کے ساتھ ہلکی بارش یا بوندا باندی متوقع ہے۔
محکمہ موسمیات کا کہنا ہے کہ ساحلی علاقوں میں مطلع جزوی ابر آلود رہنے، کبھی کبھار تیز ہوائیں چلنے اور بعض مقامات پر ہلکی بوندا باندی ہونے کا امکان ہے۔
