کوئٹہ میں 9 اور 10 محرم کے لیے خصوصی سیکیورٹی پلان نافذ، موبائل سروس معطل رہے گی
محرم الحرام کے دوران امن و امان برقرار رکھنے اور عزاداروں کی حفاظت کو یقینی بنانے کے لیے کوئٹہ میں خصوصی سیکیورٹی پلان نافذ کر دیا گیا ہے۔
ایس پی سٹی آصف غفور کے مطابق نویں اور دسویں محرم کو شہر کے حساس اور مرکزی علاقوں میں موبائل فون سروس عارضی طور پر بند رکھی جائے گی۔ یہ فیصلہ سیکیورٹی خدشات کے پیش نظر کیا گیا ہے تاکہ کسی بھی ناخوشگوار واقعے سے بچا جا سکے۔
میڈیا نمائندوں سے گفتگو کرتے ہوئے انہوں نے کہا کہ محرم الحرام کے جلوسوں اور مجالس کے پرامن انعقاد کے لیے پولیس نے جامع اور مؤثر حکمت عملی مرتب کی ہے۔ اس سلسلے میں جلوسوں کے راستوں، عبادت گاہوں اور حساس مقامات پر سیکیورٹی مزید سخت کر دی گئی ہے۔
انہوں نے بتایا کہ شہر بھر میں پولیس اور دیگر قانون نافذ کرنے والے اداروں کے اہلکار تعینات کیے گئے ہیں جبکہ اہم شاہراہوں، داخلی و خارجی راستوں اور مذہبی اجتماعات کی مسلسل نگرانی کی جا رہی ہے۔
محرم الحرام کے سیکیورٹی انتظامات کے حوالے سے منعقدہ اجلاسوں میں صوبائی حکومت، انٹیلی جنس اداروں اور متعلقہ محکموں کے نمائندوں نے شرکت کی۔ اجلاسوں میں فیصلہ کیا گیا کہ 9 اور 10 محرم کو موبائل سروس کی معطلی کے علاوہ موٹر سائیکل کی ڈبل سواری پر پابندی، اسلحے کی نمائش پر مکمل قدغن اور خصوصی ٹریفک پلان پر عملدرآمد بھی یقینی بنایا جائے گا۔
سیکیورٹی پلان کے تحت سرِآب روڈ، جناح روڈ، لیاقت روڈ اور دیگر حساس علاقوں میں اضافی نفری تعینات کی گئی ہے تاکہ کسی بھی ہنگامی صورتحال میں فوری کارروائی کی جا سکے۔
ایس پی سٹی آصف غفور کا کہنا تھا کہ انتظامیہ کا اولین مقصد محرم الحرام کے تمام پروگراموں کو پرامن اور محفوظ ماحول میں منعقد کرانا ہے۔ انہوں نے شہریوں سے اپیل کی کہ وہ سیکیورٹی اہلکاروں کے ساتھ تعاون کریں اور کسی بھی مشکوک سرگرمی کی فوری اطلاع متعلقہ حکام کو دیں۔
شہریوں کی جانب سے بھی حفاظتی اقدامات کو مجموعی طور پر مثبت قرار دیا گیا ہے۔ ان کا کہنا ہے کہ اگرچہ موبائل سروس کی عارضی بندش سے مشکلات پیش آ سکتی ہیں، تاہم امن و سلامتی کے قیام کے لیے یہ اقدامات ضروری ہیں۔
پولیس حکام نے یقین دہانی کرائی ہے کہ ایمبولینس، فائر بریگیڈ اور دیگر ہنگامی خدمات معمول کے مطابق فعال رہیں گی تاکہ شہریوں کو کسی قسم کی دشواری کا سامنا نہ کرنا پڑے۔
مزید پڑھیں: مون سون ہوائیں پاکستان میں داخل، پنجاب کے مختلف علاقوں میں بارش کا امکان
