لاہور: مون سون سسٹم کے زیرِ اثر پنجاب میں بارشوں کی پیشگوئی
مون سون سسٹم پاکستان میں داخل ہو گیا ہے، جس کے اثرات کے باعث لاہور سمیت پنجاب کے بیشتر اضلاع میں آج سے بارشوں کا سلسلہ شروع ہونے کا امکان ہے۔
محکمہ موسمیات کے مطابق لاہور میں صبح سے مطلع جزوی ابر آلود ہے اور سورج و بادل کے درمیان آنکھ مچولی کا سلسلہ جاری ہے۔ شہر کے مختلف علاقوں میں تیز ہوائیں چلنے کے ساتھ ہلکی بوندا باندی بھی ریکارڈ کی گئی۔
لاہور، گوجرانوالہ، گجرات، سیالکوٹ، نارووال، چکوال اور راولپنڈی سمیت پنجاب کے متعدد اضلاع میں بارش متوقع ہے۔
مون سون بارشوں کے پیشِ نظر میونسپل کارپوریشن، واسا، ایل ڈبلیو ایم سی اور دیگر متعلقہ اداروں کو الرٹ جاری کر دیا گیا ہے تاکہ کسی بھی ہنگامی صورتحال سے مؤثر انداز میں نمٹا جا سکے۔
محکمہ موسمیات کے مطابق لاہور میں آج کم سے کم درجہ حرارت 26 ڈگری سینٹی گریڈ ریکارڈ کیا گیا، جبکہ دن کے دوران زیادہ سے زیادہ درجہ حرارت 38 ڈگری سینٹی گریڈ تک پہنچنے کا امکان ہے۔
مزید پڑھیں: شہرِ قائد میں بادلوں کا راج، 50 کلومیٹر فی گھنٹہ رفتار سے ہوائیں چلنے کا امکان
