وفاقی وزیرِ پیٹرولیم علی پرویز ملک نے کہا ہے کہ جیسے ہی عالمی منڈی میں خام تیل کی قیمت 76 ڈالر فی بیرل تک پہنچے گی، حکومت اس کا براہِ راست فائدہ عوام کو منتقل کرے گی۔
میڈیا سے گفتگو کرتے ہوئے انہوں نے کہا کہ حکومت عوام کو ریلیف فراہم کرنے کے لیے اب تک 130 ارب روپے کی سبسڈی دے چکی ہے، جبکہ خام تیل کی عالمی قیمت میں مزید کمی آنے پر عوام کے لیے اضافی ریلیف کا اعلان کیا جائے گا۔
ایران۔پاکستان گیس پائپ لائن منصوبے کے حوالے سے علی پرویز ملک نے بتایا کہ یہ معاملہ پیرس کی عدالت میں زیرِ سماعت ہے اور حکومت مقدمے کی مؤثر انداز میں پیروی کر رہی ہے۔ انہوں نے کہا کہ ایرانی حکام کے ساتھ باہمی مشاورت سے اس معاملے کا قابلِ قبول حل نکالا جائے گا۔ ان کے مطابق ایرانی صدر نے اسلام آباد امن معاہدے میں اہم اور مثبت کردار ادا کیا۔
وفاقی وزیر نے محرم الحرام کے دوران سکیورٹی اور انتظامات کو سراہتے ہوئے کہا کہ لاہور پولیس، پاک فوج اور دیگر قانون نافذ کرنے والے اداروں نے مثالی تعاون اور پیشہ ورانہ صلاحیت کا مظاہرہ کیا۔ انہوں نے کہا کہ اللہ تعالیٰ کا شکر ہے کہ تمام امور خوش اسلوبی سے انجام پائے۔
انہوں نے مزید کہا کہ حکومت پیٹرولیم مصنوعات کی قیمتوں میں مزید کمی کے لیے مسلسل کوششیں کر رہی ہے۔ ان کے مطابق پیٹرول اور ڈیزل کی بلند قیمتوں کا بوجھ پورے ملک کے عوام نے برداشت کیا، تاہم اب حالات بہتری کی طرف بڑھ رہے ہیں۔
علی پرویز ملک نے کہا کہ اللہ کے فضل سے مشکل دور گزر چکا ہے اور اب عوام کو ریلیف ملنا شروع ہو گیا ہے۔ انہوں نے دعویٰ کیا کہ حکومت نے عالمی منڈی میں خام تیل کی قیمتوں میں ہونے والی کمی سے بھی زیادہ فائدہ پیٹرول اور ڈیزل کی قیمتوں میں کمی کی صورت میں عوام تک پہنچایا ہے۔
مزید پڑھیں: چلاس میں کلاؤڈ برسٹ، وادی تھور میں شدید تباہی، مکانات، فصلیں اور پل سیلاب میں بہہ گئے
