چلاس: گلگت بلتستان کے ضلع دیامر میں کلاؤڈ برسٹ کے بعد وادی تھور شدید سیلاب کی لپیٹ میں آ گئی، جس کے نتیجے میں متعدد مکانات، باغات، کھڑی فصلیں، رابطہ پل اور گاڑیاں سیلابی ریلے میں بہہ گئیں، جبکہ مختلف علاقوں کا زمینی رابطہ بھی منقطع ہوگیا۔
چلاس پولیس کے مطابق اچانک آنے والے سیلاب نے واپڈا کالونی اور ملحقہ سڑکوں کو بھی بری طرح متاثر کیا۔ سیلابی پانی کالونی میں داخل ہونے سے بڑے پیمانے پر نقصان ہوا، جبکہ وادی تھور کو ملانے والی شاہراہ کئی مقامات پر بند ہونے کے باعث آمدورفت معطل ہے۔
سیلاب سے متاثرہ شہریوں نے حکومت سے فوری امدادی سرگرمیاں تیز کرنے، متاثرین کی بحالی اور نقصانات کے تخمینے کے لیے ہنگامی اقدامات کا مطالبہ کیا ہے۔
اس حوالے سے اے ڈی ڈیزاسٹر منیجمنٹ دیامر امتیاز احمد کا کہنا ہے کہ متاثرہ وادی میں امدادی کارروائیوں اور سڑکوں کی بحالی کا عمل جاری ہے، تاہم راستوں کی بندش کے باعث ریسکیو ٹیموں کی رسائی اور ریلیف سرگرمیوں میں شدید رکاوٹیں پیش آ رہی ہیں۔
مزید پڑھیں: بیرونی دہشتگردی کا خاتمہ قومی ترجیح ہے، پاکستان ہر قیمت پر کامیاب ہوگا: وزیراعظم
