نارووال: تھانہ صدر کے علاقے گاؤں غازی وال میں ایک خاتون کے قتل کا ہولناک واقعہ پیش آیا، جہاں مبینہ طور پر شوہر نے بیوی کو گلا دبا کر قتل کرنے کے بعد لاش کو آگ لگا دی۔
پولیس نے واقعے کا مقدمہ درج کر کے تحقیقات کا آغاز کر دیا ہے۔ ایف آئی آر کے مطابق موضع مالوکے کی رہائشی ندا شاہین کی شادی تین ماہ قبل حماد سہیل سے ہوئی تھی۔ الزام ہے کہ ملزم اکثر بیوی پر تشدد کرتا اور اسے گھر سے نکال دیتا تھا۔
مقدمے کے متن کے مطابق گزشتہ روز حماد سہیل صلح کا کہہ کر ندا شاہین کو دوبارہ گھر لے آیا، تاہم اگلی صبح مبینہ طور پر اس نے اپنے اہلِ خانہ کے ساتھ مل کر خاتون کو تشدد کا نشانہ بنایا، گلا دبا کر قتل کیا اور بعد ازاں شواہد چھپانے کی غرض سے لاش کو آگ لگا دی۔
پولیس کے مطابق ابتدائی تحقیقات سے معلوم ہوا ہے کہ ملزم مبینہ طور پر کسی دوسری لڑکی سے شادی کرنا چاہتا تھا، جسے واقعے کی ممکنہ وجہ قرار دیا جا رہا ہے۔ تاہم اس پہلو سمیت تمام شواہد کی مختلف زاویوں سے تفتیش جاری ہے۔
پولیس نے لاش کو پوسٹ مارٹم کے لیے ڈسٹرکٹ ہیڈکوارٹر اسپتال منتقل کر دیا ہے، جبکہ واقعے کی مزید تحقیقات جاری ہیں۔
مزید پڑھیں: راولپنڈی: ڈیڑھ سالہ بچی پر چھری سے قاتلانہ حملہ، گرفتار ملزم قریبی رشتہ دار نکلا
