گلگت بلتستان کے وزیراعلیٰ امجد حسین نے کہا ہے کہ حکومت سندھ کے تعاون سے قدرتی آفات سے متاثرہ افراد کے لیے 200 گھر تعمیر کیے جارہے ہیں، گلگت بلتستان قدرتی آفات کی زد میں ہے جہاں ہر سال کلاؤڈ برسٹ اور سیلاب کی وجہ سے متعدد گھر تباہ ہوجاتے ہیں۔
محکمہ پلاننگ اینڈ ڈیولپمنٹ کی جانب سے ڈونرز کے تعاون سے شروع کیے جانے والے 16 ارب روپے لاگت کے کلائمیٹ ریزیلینس پروجیکٹ پر بریفنگ دی گئی، اس منصوبے کے تحت خطے میں ماحول دوست اور محفوظ تعمیرات، صاف پانی کی فراہمی، سیوریج سسٹم اور آسان شرائط پر قرضوں کی فراہمی کے متعدد منصوبے شروع کیے جائیں گے۔
اس موقع پرگفتگو کرتے ہوئے وزیراعلیٰ نے کہا کہ گلگت بلتستان قدرتی آفات کی زد میں ہے جہاں ہر سال کلاؤڈ برسٹ اور سیلاب کی وجہ سے متعدد گھر تباہ ہو جاتے ہیں، صوبائی حکومت نے فیصلہ کیا ہے کہ جن شہریوں کے مکانات قدرتی آفات کی زد میں آ کر تباہ ہوئے ہیں، ان کے لیے محفوظ گھر تعمیر کیے جائیں گے۔
وزیراعلیٰ نے کہا کہ وفاقی حکومت کے تعاون سے گزشتہ سال بوبر کے سیلاب متاثرین کے لیے کالونی قائم کی گئی تھی جبکہ اس سال حکومت سندھ کے تعاون سے قدرتی آفات سے متاثرہ افراد کے لیے 200 گھر تعمیر کیے جا رہے ہیں، مستقبل میں بھی ہمیں ان متاثرین کی بحالی اور انہیں محفوظ چھت کی فراہمی پر خصوصی توجہ دینے کی ضرورت ہے۔
انہوں نے ہدایت کی کہ کلائمیٹ ریزیلینس پروجیکٹ کے تحت متاثرین کے لیے محفوظ گھروں کی تعمیر کا منصوبہ شامل کیا جائے اور آفت زدہ علاقوں میں متاثر ہونے والے گھروں کی تعمیر و بحالی کے لیے اقدامات کیے جائیں اور اس کی باضابطہ منظوری متعلقہ اسٹیئرنگ کمیٹی سے حاصل کی جائے۔
گلگت بلتستان کے وزیر اعلیٰ نے ہدایت کی کہ پروجیکٹ ڈائریکٹر کے لیے متعلقہ شعبوں سے تعلق رکھنے والے امیدواروں کو بھی موقع دیا جائے تاکہ ایک صحت مند مقابلے کے نتیجے میں اہل و قابل امیدواروں کو موقع مل سکے۔
وزیراعلیٰ نے کہا کہ یہ منصوبہ بنیادی سہولیات کی فراہمی کے ساتھ خطے میں معاشی سرگرمیوں کے فروغ میں انتہائی اہم ثابت ہوگا۔
