خیبرپختونخوا کے وزیراعلیٰ محمد سہیل آفریدی نے گورنر فیصل کریم کنڈی کی جانب سے صوبے میں امن و امان سے متعلق اجلاس بلانے پر نوٹس لیتے ہوئے اپنی کابینہ کا ہنگامی اجلاس طلب کرلیا ہے۔
ذرائع نے بتایا کہ وزیراعلیٰ سہیل آفریدی نے خیبر پختونخوا کابینہ کا ہنگامی اجلاس آج صبح طلب کرلیا ہے اور تمام کابینہ ارکان کو اجلاس میں شرکت کی ہدایت کی ہے۔
ذرائع نے بتایا کہ وزیراعلیٰ لانگ مارچ میں مصروف تھے اور اسی دوران انہوں نے کابینہ اجلاس بلانے کی ہدایت کی۔
ذرائع کا کہنا تھا کہ کابینہ اجلاس کا ایجنڈا جاری نہیں کیا گیا تاہم وزیراعلیٰ سہیل آفریدی نے گورنر کی جانب سے امن و امان کا اجلاس بلانے پر نوٹس لیا ہے، وزیراعلیٰ نے گورنر کی جانب سے امن و امان کا اجلاس بلانے پر تشویش کا اظہار کیا ہے۔
ذرائع نے مزید کہا کہ کابینہ اجلاس میں انتظامی سیکریٹریز کو شرکت کی ہدایت کی گئی ہے۔
ذرائع کے مطابق کابینہ کے باوجود لانگ مارچ شیڈول کے مطابق جاری رہے گا، وزیراعلیٰ کابینہ اجلاس کے بعد لانگ مارچ میں شریک ہوں گے لانگ مارچ متنی سے خیبر کی طرف بڑھے گا۔
