گوگل نے کروم ویب براؤزر میں موجود متعدد سکیورٹی مسائل کو ختم کرنے کے لیے نئی اپ ڈیٹ جاری کردی۔
نئے ورژن میں لگ بھگ 30 سکیورٹی کمزوریاں دور کی گئی ہیں جن میں سے 4 کو انتہائی سنگین قرار دیا گیا ہے۔ ان تمام خامیوں کی نشاندہی گوگل کی اپنی ٹیم نے کی اور کمپنی کے مطابق یہ مسائل سسٹم کے مختلف حصوں کو متاثر کر سکتے تھے۔
یاد رہے کہ دنیا بھر میں تقریباً 50 سے 60 فیصد انٹرنیٹ صارفین براؤزنگ کے لیے اسی براؤزر کو ترجیح دیتے ہیں، اس لیے اس میں موجود خامیاں صارفین کے لیے بڑا خطرہ بن سکتی ہیں۔
عام طور پر یہ براؤزر خود بخود اپ ڈیٹ ہو جاتا ہے تاہم اگر آپ خود چیک کرنا چاہتے ہیں تو اوپر موجود تین نقطوں (مینو) پر کلک کریں اور ترتیبات میں جائیں۔
اس کے بعد “کروم کے بارے میں” کے آپشن پر کلک کریں، جو بائیں جانب نیچے موجود ہوتا ہے۔ وہاں آپ کو معلوم ہو جائے گا کہ براؤزر تازہ ترین ہے یا نہیں۔ اگر اپ ڈیٹ دستیاب ہوگی تو وہ خود ہی ڈاؤن لوڈ ہونا شروع ہو جائے گی۔
آخر میں “دوبارہ شروع کریں” پر کلک کریں، اور آپ کا براؤزر مکمل طور پر اپ ڈیٹ ہو جائے گا۔
