سعودی عرب نے خطے میں بڑھتی ہوئی کشیدگی پر تشویش ظاہر کرتے ہوئے تمام فریقین کو صبر و تحمل سے کام لینے اور حالات کو مزید بگاڑنے سے گریز کرنے کی تاکید کی ہے۔
سعودی عرب کے محکمہ وزارت خارجہ کی جانب سے سماجی رابطے کی ویب سائٹ ایکس پر جاری ہونے والے ایک بیان کے مطابق موجودہ صورتحال نہ صرف علاقائی بلکہ عالمی امن و استحکام کے لیے بھی خطرہ بن سکتی ہے اس لیے فوری طور پر تناؤ کم کرنے کی ضرورت ہے۔
سعودی عرب نے اس موقع پر پاکستان کی جانب سے جاری سفارتی کوششوں اور ثالثی کردار کو سراہتے ہوئے اس کی مکمل حمایت کا اعلان کیا ہے تاکہ کشیدگی کا سیاسی حل تلاش کیا جا سکے اور خطہ مزید بحران سے بچ سکے۔
بیان میں آبنائے ہرمز میں جہاز رانی کی بحالی کو بھی انتہائی اہم قرار دیا گیا کیونکہ اس راستے کی بندش عالمی تجارت اور توانائی کی ترسیل کو متاثر کر سکتی ہے۔
دوسری جانب سعودی ولی عہد محمد بن سلمان نے محمد بن زید النہیان سے ٹیلیفونک رابطہ کیا، جس میں متحدہ عرب امارات کو نشانہ بنانے والے حملوں کی سخت الفاظ میں مذمت کی گئی۔
سعودی ولی عہد نے یو اے ای کی سلامتی اور استحکام کے لیے ہر ممکن تعاون جاری رکھنے کے عزم کا اعادہ بھی کیا۔
