بچوں کے حقوق کے عالمی انڈیکس 2026 میں افغانستان سب سے نچلے درجے پر
بچوں کے حقوق سے متعلق عالمی انڈیکس 2026 میں افغانستان سب سے کم درجہ بندی حاصل کرنے والا ملک قرار پایا ہے، جس سے ملک میں بچوں کی فلاح و بہبود اور بنیادی سہولیات کی صورتحال پر تشویش مزید بڑھ گئی ہے۔
میڈیا رپورٹس کے مطابق افغانستان نے انڈیکس میں 0.214 پوائنٹس حاصل کیے اور 194 ممالک میں 194ویں مقام پر رہا۔ یہ درجہ بندی بچوں کے حقوق کے تحفظ اور ان کی فلاح کے حوالے سے انتہائی کم کارکردگی کی عکاسی کرتی ہے۔
رپورٹ میں بتایا گیا ہے کہ افغانستان میں بچوں کو صحت، تعلیم، تحفظ اور مناسب رہائشی ماحول سمیت کئی بنیادی شعبوں میں مشکلات کا سامنا ہے، جس کے باعث ان کی زندگی اور ترقی کے مواقع متاثر ہو رہے ہیں۔
عالمی انڈیکس مختلف ممالک کی کارکردگی کا جائزہ بچوں کی صحت، تعلیمی سہولیات، سماجی تحفظ اور معیارِ زندگی جیسے اشاریوں کی بنیاد پر لیتا ہے تاکہ یہ اندازہ لگایا جا سکے کہ بچوں کے حقوق کے تحفظ کے لیے کس حد تک مؤثر اقدامات کیے جا رہے ہیں۔
ماہرین کے مطابق طویل معاشی بحران، انسانی مسائل، تعلیمی پابندیاں اور بنیادی خدمات تک محدود رسائی افغانستان میں بچوں کی مشکلات میں اضافے کا باعث بن رہی ہیں۔ رپورٹ میں بچوں کی فلاح اور حقوق کے تحفظ کے لیے مزید عملی اقدامات کی ضرورت پر زور دیا گیا ہے۔
یہ رپورٹ ایسے وقت میں سامنے آئی ہے جب افغانستان میں انسانی امداد، تعلیم اور صحت کے شعبوں کو درپیش چیلنجز عالمی توجہ کا مرکز بنے ہوئے ہیں۔
مزید پڑھیں: سلامتی کونسل کا افغانستان میں دہشتگرد گروہوں کی موجودگی پرتشویش کا اظہار
