صوبائی وزیر اطلاعات شفیع جان نے پیٹرول اور ڈیزل کی قیمتوں میں کمی نہ کیے جانے پر وفاقی حکومت کو شدید تنقید کا نشانہ بنایا ہے۔
اپنے بیان میں شفیع جان نے کہا کہ عالمی منڈی میں پیٹرولیم مصنوعات کی قیمتوں میں مسلسل کمی کے باوجود وفاقی حکومت نے اس کا فائدہ عوام تک منتقل نہیں کیا۔ ان کا کہنا تھا کہ 17 نشستوں والی حکومت پیٹرول اور ڈیزل پر بھاری لیوی ٹیکس عائد کر کے عوام پر مزید مالی بوجھ ڈال رہی ہے۔
انہوں نے کہا کہ وفاقی حکومت کی ناقص معاشی پالیسیوں اور کمزور حکمت عملی کا خمیازہ عام شہری بھگت رہے ہیں۔ ان کے مطابق عوامی مینڈیٹ سے محروم حکومت کو مہنگائی اور عوامی مشکلات کا احساس نہیں، جبکہ مہنگے پیٹرول، ڈیزل اور بڑھتی ہوئی مہنگائی نے شہریوں کی زندگی مزید دشوار بنا دی ہے۔
شفیع جان نے مزید کہا کہ وفاقی حکومت کے پاس معیشت کو بہتر بنانے کے لیے کوئی مؤثر منصوبہ موجود نہیں۔ انہوں نے سوال اٹھایا کہ کیا یہی تجربہ کار ٹیم کی کارکردگی ہے؟ ان کے بقول موجودہ حکومت کی معاشی کارکردگی سوالیہ نشان بن چکی ہے اور ملک کو ترقی کے بجائے مزید بحرانوں کی طرف دھکیلا جا رہا ہے۔
انہوں نے مطالبہ کیا کہ وفاقی حکومت فوری طور پر پیٹرولیم مصنوعات کی قیمتوں میں نمایاں کمی کرے تاکہ عوام کو حقیقی اور فوری ریلیف مل سکے۔
مزید پڑھیں: لاہور، اسلام آباد ایئرپورٹس کا حفاظتی جائزہ، برطانوی ٹیم پاکستان میں
