لاہور: باغبانپورہ کے علاقے ویمن کالج روڈ کے قریب زیرِ تعمیر عمارت کا ایک حصہ اچانک گرنے سے 8 سالہ بچہ جاں بحق جبکہ 5 افراد زخمی ہوگئے۔
ریسکیو 1122 کے مطابق حادثہ اس وقت پیش آیا جب تین منزلہ زیرِ تعمیر عمارت کی تیسری منزل پر تعمیراتی کام جاری تھا۔ اچانک لینٹر اور دیوار منہدم ہونے سے ملبہ گراؤنڈ فلور اور گلی میں جا گرا، جس کی زد میں وہاں سے گزرنے والے افراد بھی آ گئے۔
ریسکیو حکام کے مطابق جاں بحق ہونے والے بچے کی شناخت 8 سالہ عبداللہ ولد امجد بٹ کے نام سے ہوئی، جو حادثے کے وقت گلی سے گزر رہا تھا۔ زخمی افراد کو فوری طور پر ملبے سے نکال کر ابتدائی طبی امداد دی گئی، جس کے بعد انہیں سروسز اسپتال منتقل کر دیا گیا۔
واقعے کی اطلاع ملتے ہی ریسکیو 1122 کی امدادی ٹیمیں اور ایمرجنسی گاڑیاں موقع پر پہنچ گئیں اور ریسکیو آپریشن شروع کر دیا۔ ابتدائی طور پر 6 افراد کے زخمی ہونے کی اطلاع موصول ہوئی تھی، تاہم بعد ازاں ایک زخمی بچہ دورانِ علاج دم توڑ گیا، جس کے بعد جاں بحق افراد کی تعداد ایک ہوگئی جبکہ 5 افراد زخمی ہیں۔
ریسکیو حکام کا کہنا ہے کہ حادثے کی اصل وجہ معلوم کرنے کے لیے تحقیقات جاری ہیں، جبکہ ملبہ ہٹانے اور متاثرہ مقام کو محفوظ بنانے کا کام بھی مکمل کیا جا رہا ہے۔
مزید پڑھیں: کراچی، غیر قانونی طور پر مقیم افغان باشندوں کے خلاف کریک ڈاؤن، 38 افراد افغان کیمپ منتقل
