ایشین گیمز میں چین کے خلاف آج کے میچ میں پاکستان ہاکی ٹیم اہم کھلاڑی سے محروم ہوگئی۔
تفصیلات کے مطابق ٹورنامنٹ منتظمین اور ایشین ہاکی فیڈریشن نے فارورڈ رانا وحید اشرف کو ایک میچ کے لیے معطل کردیا ہے جس کےبعد وہ چین کےخلاف میچ سے باہر ہوگئے ہیں۔
ذرائع کے مطابق رانا وحید اشرف کی ہاکی اسٹک سے ازبکستان کے کھلاڑی کے سر پر چوٹ لگی تھی جس پر انہیں ایک میچ معطلی کی سزا سنائی گئی ہے۔
رانا وحید اشرف پاکستان کی فارورڈ لائن میں ریڑھ کی ہڈی کی حیثیت رکھتے ہیں، ان کی چین کے خلاف میچ میں عدم موجودگی پاکستان کے لیے بڑا دھچکا ہے۔
پاکستان نےایشین گیمز میں اب تک دو میچز کھیلے ہیں جن میں تھائی لینڈ کو 0-9 سے مات دی اور ازبکستان کے خلاف پاکستان کی جیت کا اسکور 1-5 رہا۔
