اسرائیلی وزیرِاعظم بنجمن نیتن یاہو نے کہا ہے کہ امریکی صدر ڈونلڈ ٹرمپ کے ساتھ ان کے قریبی تعلقات ایران سے لاحق خطرے کو ختم کرنے میں مددگار ثابت ہوں گے۔
ان کا یہ بیان ایسے وقت میں سامنے آیا ہے جب اسرائیل میں انتخابات کی دوڑ سخت مقابلے کی صورت اختیار کر چکی ہے اور ٹرمپ نے بھی نیتن یاہو کی حمایت کا اعلان کیا ہے۔
خبر رساں ادارے اے ایف پی کے مطابق، نیتن یاہو نے اپنی جماعت لیکوڈ کی جانب سے جاری کردہ ایک ویڈیو میں ووٹروں سے اپیل کی کہ وہ ٹرمپ کے بیان کو اہمیت دیں۔
اسرائیلی وزیرِاعظم نے ویڈیو میں دعویٰ کیا کہ ’’ہم نے ایران کو کچل دیا ہے۔‘‘ انہوں نے مزید کہا کہ ٹرمپ کے ساتھ ان کی شراکت داری آئندہ دو برسوں یا اس سے بھی پہلے ایران کے خطرے کو ختم کرنے کے لیے جاری رہے گی۔
نیتن یاہو کا یہ بیان اسرائیل اور امریکا کے درمیان قریبی تعاون اور ایران سے متعلق ان کی مشترکہ حکمتِ عملی کو انتخابی مہم کے تناظر میں نمایاں کرتا ہے۔ تاہم، ایران کے خلاف آئندہ اقدامات کی تفصیلات اس بیان میں نہیں بتائی گئیں۔
