دہلی ( نیوز ڈیسک )کشمیر اور بھارتی اقلیتوں کے خلاف مظالم اور انسانی حقوق کی خلاف ورزیاں چھپانے کی خاطر بھارت میں سوشل میڈیا پر پابندیاں لگانے کی تیاریا ں شروع مسودہ قانون تیار ۔بھارتی حکومت نے نئے آئی ٹی قواعد کے تحت جھوٹی خبروں پر پابندی کی آڑ میں سوشل میڈیا پلیٹ فارمز پر پابندی لگانے اور سرکاری کنٹرول کا شکنجہ کسنے کا فیصلہ کرلیا ہے ۔ غیر ملکی خبر رساں ایجنسی رائٹرز کے مطابق بھارتی حکومت رواں ہفتے جاری ہونے والے ملک کے آئی ٹی قواعد کے مسودے کی تجویز کے مطابق سوشل میڈیا پلیٹ فارمز کو کسی بھی ایسی معلومات نشرکرنے کی اجازت نہیں دے گی جسے وہ جھوٹ سمجھتی ہو۔آئی ٹی قوانین بھارتی وزیراعظم نریندر مودی کی حکومت کے متعدد اقدامات میں سے پہلے ایسے اقدام ہیں جن کو بڑی ٹیکنالوجی کمپنیوں پر کنٹرول کرنے کی کوشش کے طور پر دیکھا جا رہا ہے۔رپورٹ کے مطابق ایسی معلومات جس کو پریس انفارمیشن بیورو یا حکومت کی طرف سے فیکٹ فیکچنگ کے لیے مجاز کوئی دوسری ایجنسی یا محکمہ غلط یا جھوٹی سمجھتا ہے تو وہ معلومات دینا اس مسودے کے تحت ممنوع ہوگی۔رپورٹ میں بتایا گیا ہے کہ ایک بار جب معلومات کی اس طرح شناخت ہو جاتی ہے، تو سوشل میڈیا پلیٹ فارمز یا دیگر آن لائن اداروں کو یہ یقینی بنانے کے لیے ممکنہ کوششیں کرنی ہوں گی کہ صارفین ایسی معلومات کو نشر، ڈسپلے، اپ لوڈ، ، اشاعت، ترسیل، اسٹور، اپ ڈیٹ یا اشتراک نہ کریں۔