امریکی صدر ڈونلڈ ٹرمپ نے مصنوعی ذہانت (اے آئی) کی نگرانی اور اس شعبے کو منظم کرنے کے لیے ایک نئی ’’اے آئی فورس‘‘ بنانے کا اعلان کردیا ہے۔ انہوں نے کہا ہے کہ وہ جلد مصنوعی ذہانت کے لیے ایک خصوصی اے آئی سربراہ بھی مقرر کریں گے۔
ٹرمپ نے سوشل میڈیا پلیٹ فارم ٹروتھ سوشل پر کہا کہ امریکا مصنوعی ذہانت کی صنعت کی ترقی میں رکاوٹ نہیں بنے گا بلکہ اس کی معاونت اور نگرانی کرے گا۔ ان کے مطابق موجودہ فوجداری اور سول قوانین کے ذریعے اے آئی کے ممکنہ غلط استعمال سے نمٹا جاسکتا ہے۔
امریکی صدر نے اس سے قبل مصنوعی ذہانت اور ڈیٹا سینٹرز کے خلاف ہونے والی تنقید کو بھی مسترد کیا تھا اور کہا تھا کہ امریکا کو اے آئی کے شعبے میں اپنی عالمی برتری برقرار رکھنی چاہیے۔
ٹرمپ نے دعویٰ کیا کہ مصنوعی ذہانت آنے والے دور کی ایک بڑی صنعتی تبدیلی ثابت ہوسکتی ہے اور امریکا کو اس شعبے میں چین اور دیگر ممالک پر اپنی برتری برقرار رکھنی چاہیے۔
دوسری جانب اے آئی صنعت کے بعض اہم رہنماؤں نے ٹیکنالوجی کی ترقی کی رفتار سست کرنے اور اس کے ممکنہ خطرات پر زیادہ مؤثر نگرانی کا مطالبہ کیا ہے۔
اینتھروپک کے سربراہ ڈاریو اموڈی، اوپن اے آئی کے سربراہ سیم آلٹمین اور ایلون مسک سمیت بعض ٹیکنالوجی رہنماؤں نے اے آئی کی تیز رفتار ترقی سے پیدا ہونے والے خطرات پر احتیاط کی ضرورت پر زور دیا ہے۔
