وزیراعظم شہباز شریف نے کہا ہے کہ دورے کیلئے چینی وزیراعظم لی چیانگ کی دعوت کا مشکور ہوں، پاک چین سفارتی تعلقات کے75 سال مکمل ہونے پر مبارکباد پیش کرتا ہوں۔
وزیراعظم شہبازشریف کے اعزاز میں عظیم عوامی ہال میں پُروقاراستقبالیہ تقریب کا انعقاد کیا گیا، چین کے وزیراعظم لی چیانگ نے پاکستانی ہم منصب کا پرتپاک استقبال کیا، وزیراعظم کو چین کی مسلح افواج کے چاق چوبند دستوں کی طرف سے گارڈ آف آنر پیش کیا گیا۔
تقریب سے خطاب کرتے ہوئے وزیراعظم نے کہا کہ چیلنجز،مشکل حالات اوربحرانوں میں چین نے ہمیشہ پاکستان کا ساتھ دیا،جب بھی چین آتے ہیں ،نئی تعمیرات اورترقی دیکھنے کو ملتی ہے۔
انہوں نے کہا کہ دنیا مشکل صورتحال سے دوچار ہے،دعا ہے امن ہمیشہ کیلئے بحال ہو، ایران امریکا جنگ بندی کیلئے پاکستان کی کوششوں کی حمایت پر چینی صدر کا مشکور ہوں، چینی صدرشی جن پنگ کے 4 نکاتی ایجنڈے کی تائید کرتے ہیں۔
ان کا مزید کہنا تھا کہ خلیجی ممالک میں بحران موجود ہے، فیلڈ مارشل عاصم منیر نے ایران امریکا رابطوں میں اہم کردار ادا کیا، مشرق وسطیٰ میں قیام امن سے متعلق کافی پیشرفت ہو چکی ہے، معاملات درست سمت میں جا رہے ہیں۔
اس موقع پر چینی وزیراعظم لی چیانگ نے کہا کہ پاکستان نے علاقائی امن کیلئے مثبت کردار ادا کیا، پاکستان کے ساتھ باہمی دلچسپی کے امور پر بات چیت کیلئے تیار ہیں۔
