کراچی: وفاقی تحقیقاتی ادارے (ایف آئی اے) امیگریشن نے جناح انٹرنیشنل ایئرپورٹ کراچی پر کارروائی کرتے ہوئے مبینہ غیر قانونی سفری انتظامات کے شبہے میں آذربائیجان جانے والے دو مسافروں کو پرواز سے آف لوڈ کر دیا۔
ایف آئی اے کے مطابق دونوں مسافر پاکستانی پاسپورٹ پر وزٹ ویزے کے ذریعے آذربائیجان روانہ ہو رہے تھے۔ روکے جانے والے مسافروں کی شناخت اظہر علی پنہور اور اسد اللہ کے نام سے ہوئی، جن کا تعلق ضلع دادو، سندھ سے ہے۔
ترجمان ایف آئی اے کے مطابق ابتدائی تفتیش کے دوران مسافروں نے بتایا کہ ان کا رابطہ پہلے سلیم نامی شخص سے ہوا، جس نے بعد ازاں انہیں ٹریول ایجنٹس راجہ اور سعید سے ملوایا۔
تحقیقات کے مطابق سعید آذربائیجان میں مقیم ہے، جبکہ راجہ نامی ایجنٹ نے چار افراد کو وزٹ ویزے پر آذربائیجان بھجوانے اور ہوٹل مینجمنٹ کے شعبے میں ملازمت دلوانے کے عوض 18 لاکھ روپے طلب کیے تھے۔ مسافروں نے بتایا کہ اس رقم میں سے 14 لاکھ روپے پیشگی ادا کیے جا چکے تھے۔
ایف آئی اے کا کہنا ہے کہ واقعے میں ملوث تمام افراد کی شناخت، مالی لین دین کی جانچ اور دیگر شواہد اکٹھے کیے جا رہے ہیں۔ حکام کے مطابق معاملے کی تحقیقات جاری ہیں اور شواہد کی روشنی میں متعلقہ قوانین کے تحت مزید قانونی کارروائی عمل میں لائی جائے گی۔
مزید پڑھیں: بیرونی دہشتگردی کا خاتمہ قومی ترجیح ہے، پاکستان ہر قیمت پر کامیاب ہوگا: وزیراعظم
