امیر جماعت اسلامی حافظ نعیم الرحمن نے کہا ہے کہ حکومت نے پیٹرول ریلیف کے نام پر عوام کو دھوکا دیا، لیوی بھتہ ختم نہ ہوا تو حکمران عوامی غیض و غضب کا سامنا کرنے کیلیے تیار رہیں، اسلام آباد کی طرف پیدل مارچ کریں گے۔
ان خیالات کا اظہار انہوں نے لاہور سمیت ملک بھر میں پٹرولیم لیوی پر بیٹھے دھرنے کے شرکاء سے خطاب کرتے ہوئے کیا۔انہوں نے دھرنے جاری رکھنے کا اعلان کرتے ہوئے کہا کہ بیس ستمبر کو اسلام آباد مارچ اور کل کراچی ، سترہ ستمبر کو لاہور اور اٹھارہ ستمبر کو مردان اور پشاور میں تاریخی جلسے کیے جائیں گے۔
انہوں نے اپوزیشن سے رابطے جاری رکھنے کا بھی اعلان کرتے ہوئے کہا کہ حکمرانوں کی عیاشیاں جاری ہیں اور یہ واضح ہے کہ عوام چاہیے برباد ہوجائیں حکمرانوں کو اس سے کوئی غرض نہیں، تاہم ہم نے اس ظالم نظام کے خلاف تاریخی جدوجہد جاری رکھنی ہے۔
حافظ نعیم نے کہا کہ سودی معیشت اور سرمایہ دارانہ نظام نے پوری دنیا کو تباہی کے دہانے پر پہنچا دیا ہے ۔ پاکستان کے حکمرانوں نے آج پھر سود کی شرح کو برقرار رکھنے کا اعلان کیا ہے ان کے لیے شرم سے ڈوب مرنے کا مقام ہے کہ اللہ اور اس کے رسول صلی اللہ علیہ وسلم سے جنگ کررہے ہیں۔انہوں نے کہا کہ سود کی لعنت کے خلاف آواز بلند نہ کرنے والے بھی دراصل حکمرانوں کی خاموش حمایت کررہے ہیں۔ ملک کے ڈھائی کروڑ مزدوروں میں سے 84 فیصد کو بنیادی حقوق تک حاصل نہیں حکمران خاندان بتائیں کہ ان کی ملوں میں کام کرنے والوں کو کتنی سہولیات اور تنخواہ ملتی ہے عوام کے لیے چینی کی قیمتیں بڑھ رہی ہیں چینی مافیا کے لیے درآمد اور برآمد میں منافع ہے ہر پارٹی میں مافیا موجود ہے۔
