انسداد دہشتگردی عدالت نے وزیراعلیٰ پنجاب مریم نواز اور وزیراعظم کے مشیر رانا ثناء اللہ سیمت دیگر لیگی رہنمائوں کو نیب آفس حملے کے مقدمے میں بری کر دیا۔
اے ٹی سی لاہور نے مریم نواز کی پیشی کے موقع پر نیب آفس پر حملے کے مقدمے کا محفوظ فیصلہ سنایا۔
عدالت نے پراسیکیوشن کی مقدمے کو خارج کرنے کی استدعا منظور کرتے ہوئے مریم نواز کے خلاف مقدمہ خارج کر دیا۔ پولیس نے مقدمے کی اخراج رپورٹ عدالت میں پیش کی تھی جس میں کہا گیا کہ مریم نواز سمیت دیگر کیخلاف نیب آفس پر پتھراؤ کے الزامات ثابت نہیں ہوئے۔
پولیس کے مطابق مقدمہ 2020 میں تھانہ چوہنگ میں ڈپٹی ڈائریکٹر نیب محمد اصغر کی مدعیت میں درج کیا گیا تھا جس میں مریم نواز، رانا ثنا اللہ، کیپٹن (ر) صفدر، بلال یاسین اور دیگر لیگی رہنماؤں کو نامزد کیا گیا تھا۔
مقدمے کے مطابق مریم نواز کی رائیونڈ اراضی کیس میں نیب پیشی کے موقع پر کارکنوں نے پولیس پر پتھراؤ کیا تھا، عدالت نے تمام شواہد کا جائزہ لینے کے بعد پولیس کی اخراج رپورٹ منظور کرتے ہوئے کیس نمٹا دیا۔
