لندن: انٹرنیشنل ہاکی فیڈریشن (ایف آئی ایچ) پرو ہاکی لیگ میں پاکستان ہاکی ٹیم کا مہم انتہائی مایوس کن انداز میں اختتام پذیر ہوئی، جہاں گرین شرٹس کو اپنے آخری میچ میں انگلینڈ کے ہاتھوں 7-0 کی بھاری شکست کا سامنا کرنا پڑا۔
لندن میں کھیلے گئے اس مقابلے میں انگلینڈ نے ابتدا ہی سے کھیل پر مکمل کنٹرول برقرار رکھا۔ میزبان ٹیم کی جانب سے نکولس بینڈوراک نے دو گول اسکور کیے، جبکہ ہنری کرافٹ، زیکری والیس، سیموئل ہوپر، سیموئل ٹیلر اور سام وارڈ نے ایک، ایک گول کر کے اپنی ٹیم کی بڑی کامیابی میں حصہ ڈالا۔
اس شکست کے ساتھ ہی پاکستان ہاکی ٹیم پرو ہاکی لیگ کے تمام 16 میچز میں ناکامی سے دوچار رہی اور پورے ایونٹ میں ایک بھی فتح اپنے نام نہ کر سکی۔
اعداد و شمار کے مطابق پاکستان نے ٹورنامنٹ کے دوران مجموعی طور پر 22 گول اسکور کیے، جبکہ مخالف ٹیموں نے گرین شرٹس کے خلاف 79 گول داغے۔ یوں 16 میچز کے اختتام پر قومی ٹیم کا گول ڈیفرنس منفی 57 رہا، جو ایونٹ میں اس کی غیر تسلی بخش کارکردگی کو واضح کرتا ہے۔
مزید پڑھیں: فیفا ورلڈ کپ میں مایوس کن نتائج، ہیڈ کوچ کا استعفیٰ
