ویمنز کی عالمی نمبر ایک ٹینس اسٹار آرینا سبالینکا نے گرینڈ سلیم ٹورنامنٹس کو خبردار کیا ہے کہ اگر کھلاڑیوں کے مطالبات پورے نہ کیے گئے تو بائیکاٹ کا امکان بڑھ سکتا ہے۔
تفصیلات کے مطابق آرینا سبالینکا سمیت 20 نمایاں کھلاڑیوں نے حال ہی میں ایک بیان جاری کرتے ہوئے فرنچ اوپن کی انعامی رقم پر شدید مایوسی کا اظہار کیا ہے۔
ان کا مؤقف ہے کہ ٹورنامنٹس کی آمدنی میں کھلاڑیوں کا حصہ کم ہے جبکہ اصل کشش بھی وہی ہوتے ہیں۔
کھلاڑیوں کا کہنا ہے کہ رواں سال رولانڈ گیروس میں انعامی رقم کل آمدنی کے 15 فیصد سے بھی کم ہوگی، جسے 22 فیصد تک بڑھانے کا مطالبہ کیا جارہا ہے۔
اس کے علاوہ پلیئر ویلفیئر پروگرامز میں سرمایہ کاری اور بہتر نمائندگی بھی ان کے اہم مطالبات میں شامل ہیں۔
سبالینکا کے مطابق ٹینس کا اصل حسن کھلاڑیوں سے ہے اور انہی کی وجہ سے شائقین کو تفریح ملتی ہے، اس لیے انہیں زیادہ معاوضہ ملنا چاہیے۔
امریکی اسٹار کوکو گاف نے بھی اس مؤقف کی حمایت کرتے ہوئے کہا کہ اجتماعی اقدام سے ہی تبدیلی ممکن ہے اور یہ صرف موجودہ نہیں بلکہ مستقبل کے کھلاڑیوں کے لیے بھی اہم ہے۔
تاہم عالمی نمبر تین ایگا سواتیک نے بائیکاٹ کو قدرے سخت قدم قرار دیتے ہوئے مذاکرات کو ترجیح دینے پر زور دیا ہے۔
