برکینا فاسو: برکینا فاسو کی فوجی حکومت نے فرانس کے ساتھ سفارتی تعلقات فوری طور پر ختم کرنے کا اعلان کر دیا ہے۔
میڈیا رپورٹس کے مطابق حکومت کا کہنا ہے کہ دونوں ممالک کے تعلقات کا جامع جائزہ لینے کے بعد یہ فیصلہ کیا گیا۔ حکام کے مطابق باہمی احترام، قومی خودمختاری اور داخلی معاملات میں عدم مداخلت جیسے بنیادی اصولوں کی مسلسل خلاف ورزی کے باعث فرانس کے ساتھ سفارتی روابط برقرار رکھنا ممکن نہیں رہا۔
سرکاری بیان میں فرانس پر الزام عائد کیا گیا کہ وہ برکینا فاسو کے خلاف نوآبادیاتی عزائم رکھتا ہے، ملکی داخلی امور میں مداخلت کرتا ہے اور ایسے عناصر کی پشت پناہی کر رہا ہے جو ملک اور خطے میں بدامنی اور عدم استحکام کو فروغ دے رہے ہیں۔
حکومت نے واضح کیا کہ سفارتی تعلقات ختم کرنے کا فیصلہ صرف دونوں ریاستوں کے درمیان سرکاری تعلقات تک محدود ہے، جبکہ دونوں ممالک کے عوام کے درمیان تاریخی، ثقافتی اور سماجی روابط متاثر نہیں ہوں گے۔
برکینا فاسو کی حکومت نے اپنے شہریوں پر زور دیا کہ وہ فرانس سمیت تمام غیر ملکی باشندوں کے ساتھ قانون کی پاسداری اور باہمی احترام کے اصولوں کے مطابق برتاؤ کریں۔
دوسری جانب فرانس نے برکینا فاسو کے فیصلے کو مسترد کرتے ہوئے اسے بے بنیاد قرار دیا ہے اور کہا ہے کہ اس معاملے پر مناسب جوابی اقدامات پر غور کیا جا رہا ہے۔
مزید پڑھیں: وینزویلا میں شدید زلزلے کے بعد بڑے پیمانے پر جانی نقصان کا خدشہ
