سعودی عرب پر عراقی ڈرون حملوں کے بعد عراقی وزیراعظم علی فالح الزیدی نے اعلیٰ فوجی کمانڈر کو عہدے سے برطرف کر دیا۔
سعودی وزارت خارجہ کے مطابق ریاض اور مدینہ کے علاقوں میں عراق سے کیے گئے ڈرون حملوں کے نتیجے میں متعدد افراد زخمی ہوئے جس کے بعد سعودی عرب نے مشرقی-مغربی آئل پائپ لائن عارضی طور پر بند کردی۔ عراقی وزیراعظم کی درخواست پر سعودی عرب نے فی الحال جوابی کارروائی نہ کرنے کا فیصلہ کیا ہے۔
عراقی وزیراعظم کے دفتر کے مطابق تحقیقات میں تصدیق ہوئی کہ سعودی عرب کو نشانہ بنانے والے ڈرون حملے عراق سے کیے گئے تھے جس کے بعد جنوبی عراق کے صوبے میسان میں فوجی کارروائیوں کی نگرانی کرنے والے ایک اعلیٰ کمانڈر کو برطرف کردیا گیا۔
بیان میں کہا گیا ہے کہ حملوں کے ذمہ داروں کے خلاف سخت کارروائی کی جائے گی۔ عراقی فوج کے ترجمان کے مطابق وزیراعظم نے حملوں کے حالات اور ان کے پیچھے موجود فریقین کی فوری تحقیقات کا حکم دیا ہے جبکہ ملوث ثابت ہونے والے ہر شخص کے خلاف قانونی کارروائی کی جائے گی۔
